KA GAM LEI

Pupa' satsa, Sianmang' banzal,
Zokuam gamlei, nim dildial e;
Phualva lenna, Tunnu' gam nuam,
Ka zua' saulim, piandang sa'ng e.

Ciimnuai tate'n, zaila awi e,
Zogam lei-ah, a sing limlian;
Anah limbel, phualva tut khawl e,
Simlei bei dong, tullo ding aw e.

Kumkhen lenkhuang, Mualkuam thawnin,
Tuan pupate'n kum khuado e;
Sum bang tuahna, Zogam lei-ah,
Itna sinthu, Sialbang lian e.

Thang Ho Lian Do unau itna,
Zophualva bang, itna hi e;
Khangsawn momno, Zosuan tate'n,
Tuu bang ciingin, li bang cing hen aw.

Phuitong pakin, huihkhi lang e,
Zolawktate, tau ngeu ngeu e;
Tangkhua khalin, phalbi dang zong,
Ngilhni omlo, ka gamlei aw e.

By: Tg Go Lam Khup(Khuppi), Geol Final

LUNGDAM

Hong mudah ngei te tung ah ka lung dam...
Amau hang in ka thuakzawhna khang hi.

Hong it ngei te tung ah ka lung dam...
Itna lung tang hong nei sak hi.

Hong haza ngei te tung ah ka lung dam...
Ka ki muanna hong khang sak hi.

Hong thusim te tung ah ka lung dam...
Kei hong thupi suah sak hi.

Ka ki thuah pi ngei te tung ah ka lung dam...
Ka nuntakna hong sang khai uh hi.

Kei hong nu sia te tung ah ka lung dam...
Na khempeuh kikhel thei a hih lam hong phawk sak hi.

Ka gei ah hong om pih suak te tung ah ka lung dam...
Itna man le itna siangtho hong thei sak hi.

Anonymous

GUALZAWHNA NI SUAK DING

Huihpi nun'sim pukkhin hileh,
Koi-ah sinkung om nawn ding.....?

Tui khan' simin tum cip hileh,
Koi-ah mual sang om nawn ding.....?

I sup simin luankhi luang le'ng,
Koi-ah luankhi om nawn ding.....?

Bawlsiatna hang i gam i nam
Zun zomlah zong, khangsawn momno,
Gia bang zun dia na pallun ding....?

OH... U le nau....

Thanemna hem thokik teitei
Khantoh na'ng gel, mainawtin pai,
Zingciang thaiciang nikhat teitei
Ei a'n gualzawh ni suak ding......

Pu Zam Khan Thang, DipTh

Eite' Khempeuh' Leitung

Ka leitung...
Ko pasalte' leitung...
No numeite' leitung...
Mihoih dangdangte' leitung...
Khutdawhngente' khuapi...
Mi khempeuhte' leitung...
Itna gilkialna mun...
Ngeina man, mel muh lohna gammang tulak...
Lainatna ciktui bang akanna...
Hitlar' khang hun...
Mao Zedong' pallai sunni...
Sadam' lenlai ni...
U Saw' gulpi hun le nite...
Bei phial mah leh...
Koi-ah om hiam?...
Ahoih leitung...
Itna gam nuam...
Suantakna mun...
Eite' zonzon leitung...
Hih khuamial gam pan...
Kuate'n ong hon zo ding hiam....?

Demo Tuang(MV),BA(Eng)

E - ETLAWM MUALKUAM ZOGAM NUAM

Tuan pupa le Zolianute'n
"E-Etlawm mualkuam Zogam nuam" ci-in
Lam sai bualna Tunnu gam hi.

Gam khisa le Zo phualvate'n
Sabang tatna, namcin zatam
Pallun heisa, Tunnu gam hi.

Khangthak Tunnu, gam lei keugaw
Gam khisa le Zo phualva'n lensanta
Namcin zatam, Zo heisate dang ta ee.

Tunnu gam lei, Zogam nuam in
Patpuanbang sia, paalheu ta a,
Tunnu' luankhi, gialbang kiata.

Siamsin momno, Lia le Tangte'n
Gal khuadak in, Tunnu gam lei
Giabang zun ding, lung sit lo aw.

Sak le khang pan, Sesum minthang
I lawh siampil, naubang pomin
Tunnu' luankhi, hehin nem leng.

Tunnu gam nuam, dawn suak dingta
Zo phualva le namcin zatam
Heisa palte, Tunnu gamah
Etin lawmin, pal lunkik ding hi.

Agnex Vung, Tedim

TONGLUAN SIAMSIL

Sinlai lungsung
Hong phawng zo den
Tong kuppihloh vang ngaih zolia
Zo tangbang na dam maw
Nihngel kal ah
Amual aguam
A tui te in gibang khen zong
Itna tang khau
Simcing bang gil hi e.
Melmuhloh hang
Itna tong khum
Taksinthu te
Anglai awhkhi bang
Selung vom ding
Tang lungzuang in
Lailung muangin na hei ing e.
Zanglei kuampan
Zolen mualdung galkhua donin
Melmuh kik ding
Hai bang ngak sa’n
Mualdawn vangkhua
Vang ngaihno siang
“Siam bang sinna
Sang hong kik ding”
Siamsil laileng
Na tong hong luan ve aw…

By, Langh Do Lian

MELMUH TONGSAN

Ngaih aw na ID
Gtalk ah ka neih bek zong
Taang ka zuan nuam tuam naa ee.

Vangngaih’ ID
Gtalk ah mei bang tang hong eng teutau
Ka muhphetin ka laidipphu ziin bang ling ee.

Ngaih aw,
VZO ah na sakmel lawm
kong muh khak ciang nun bang nuam, nuam ngaungau ee.

Nihgel lungtuak VZO ah
melmuh tongsan ee, Lelnop zatam lel ding mel theilo,
“Dam maw, dam maw” bang ci pahpah kha’ng ee.

Kang mei bangsa Kasinlai
VZO in vot sak ee Bang cik ciang
Hih bang hunnuam kangah kik zentam cici ing ee.

By: tpthawnpu
March 24, ‘10

PLASTIC NGAIHNO

Sian siamna tawh, kil bang khangin
Gual tawh tan bang, kimta ing e,

Tun le zuate, tongkup kul lo
Ngalkhaat bangin, Hei thei ta ing...

Khattang heina, Siamsinna pan
Ka duang hong zen, ka lai hong kuai
Liapal zatam, va mu sese...

Kawlpi siamsin, liapal za-in
Tam mah taleh, lo bang a tul
Angkawi dingin, liapal khatbek ahi ve maw...

Siamsin liapal, za-in tam zong
Ka tong hong sang, ka ngaihno in
A tuo thei lo a muat ngei lo
Plastic bang khanto, a nungta den
Kong itna hi.

Tg Sianpu

TAANG’ DEIH LIAPAL

Nungak tuaktuak; Amel hoihte kingai zaw,

Amel hoih tuaktuak; Angaihbangte kingai zaw,

Angaihbang tuaktuak; Athacingte kingai zaw,

Athacing tuaktuak,; A thusiamte kingai zaw,

A thusiam tuaktuak; A kizente kingaizaw,

A kizen tuaktuak; khutsiamna neite kingaizaw,

Khutsiam tuaktuak; A gamtat hoihte kingai zaw.


tpThawnpu
Feb.19, ‘08

LIA’ DEIH TANGPAL

Tangval tuaktuak; Amel hoihte kingaizaw

Amel hoih tuaktuak; Athacingte kingaizaw,

Athacing tuaktuak; Akamsiamte kingaizaw,

Akamsiam tuaktuak; Ahaute kingaizaw,

Ahau tuaktuak; Anehzote kingaizaw,

Anehzo tuaktuak; Pilna neite kingaizaw,

Pilna nei tuaktuak,; Agamtat hoihte kingaizaw.

Tg. Thawnpu, BBA, Sakollam, Tedim
Feb.18, ‘08

SUL HONG HEIKIK IN MAW

Solkha tang nuai zua pahtangah
Sinthu guicing an bang kikup
Sang bang kinohlai hunte
Mu bang ngai mah sing...

Maimit hem aluai den
Ngaih duangsuah heisa bang pal
Et cimin gamlei nahzu bang
Puah khawm nuam sing...

Beng kha a ging den
Zu bang khum ngaih tongdam
Lengthe khuang leh
Ka ngaih lianu sa kha zel ing...

Ngai ing ci-a tonglel ngam loh
Ka sinlai aw omlai-in piang
Singdang angah zal ding ka phallo
Na heina pan khua hong tuah dih aw...

Kua bawlin vang in la a hiam?
Gual dawh ai maw, sesem bawl
Ka tongsuah lam bang khial ka hiam?
Ka zalmang hizaw leh ci'ng e...

I tutna pahtang tung se-ui tawh
Lungzuan an bang kikum zel ing
Sing gam lei-ah kumkhua sawt
Va bang hong le'nsan ke'n...

Lunglen luankhi ciautui-in luang
Sul hong heikik in maw
Sena ngaihno
Hai bang na ngak vang...

Tg Duang Vul, MSc(Maths), Pyidawtha

HONG LEL LO AW

Hemlam sinthu ahih leh
Hong ngai ing ci’n hong lel lo aw..
Tak a om sinthu lobuang,
Na sinkulthuk hong kum lo aw..
Tg’ sinlai sunim ding’leh
Pheiphung suankhawm banzaal hong len lo aw..
Tak a sep pat natup loh buang
Nang lunggeel hong kum lo aw..
Nasep bangkim hemlam sinthu a hih leh
Kei maimit hong suan lo aw..
Mangpha khaknuam na hih leh
Dammaw ci’n hong ho lo aw….
Lobang tul dong nacih a leh
Nang tongdam nem hong za nuam veng..
Lobang tul ding lo buang
Luankhi nul ding lung lau ing ee..


By: tpthawnpu
Feb.14, 2010

KA NAAKGUH

Nang tawh tan bang tenpih ding
Leimi liapal khat beek omlo
Ka naakguh ding cih bang kong tel
Ka sisan tawh ka lungtangah kigelh khin zo
Pasian le kei lo kua'n thei se dia!

Pianpih melhoih
Liapal ngaihin saktheihpih lua cia
Pianna tual niam hang
Lung in khiam zo ke'n cia
Tul lel dawna Heisa pal aw
Ke'n ong lawh zawh sawm ning e!

Koi-ah va bang nong len san
Sawl bang vulin tum bang guai ve'ng
Khualah om tualah na teng ciang
Siangta dong le zo ta'ng
Kuan hong it hong ngai zaw cih
Hun le nite'n thu genin cia!

Cik ciang dawn bang kituah nam
Vai bang nong tun ding hai bang ngak ing
Miza lai-ah nang tawh tullo
Sawl bang hei-in gua bang hin ding
Ka hem ngaihsut sialin ka lungtang si!

Tg Nang Khen Khai,2nd yr Eng(Hons)

NANG THEILO

Tu zan ihmu lo...
Tu sun lung leng lua...
Ka lungtang sa lua... kuang dektak!...
Nang kong ngaihsutsutna'n...
Ke'n hong phawk lua ingh...
Second sialin...
Koi munah na om tam?...
Na ankam a lim diai deh!...
Kua tawh na om zen tam?...
Ci'n tangpa ka sinlung hong phawng...
Ngilh ni omlo lianu...
Ka lungtang si-le-sa sungpan...
Lianu...lianu...ci'n hong gen den...
Haksa sa mahmah ingh...
Na thu le na late paihkhiat ding...
Ka lungtang hong guksak lianu aw...
Ka nuntakna sehnel gam bang...
Tuate nang thei lo...


MV Cristiano Tuang, BA(Eng)

KHANGTHAK ZOMI AW, MAPANG KHAWMNI

Etlawm Tunnu Zogam; Sian in lumbang hongsung ding a,
Singdang gam tawh tanbang kimding, hongsiam ding hi.

Hun leh nite kikhel in, kum le kha kivei bang in,
Khangthak Zomi kilbang hong khangsak e.

Khangthak Zomi te aw, pianna Zogam giabang zunni, zaitha hat lai,
Khangthak Zomi khut khat tawi khe khat khai bang, maa pangkhawm ni,
Zogam kilbang khan nang, Zogam tang bang dam nang, lungtup bel hi.

Zomi mimbang pianna, minam
Zo phualva tawh tong ciamsa Zomi ten
Lungtuak maaciang suan, hanlung ciam ciat leng e.

Sawl bang heina peuh ah, Sian tawh maaciang suan khawm ni.
Pilna siamna le zaitha siitlo Zogam ading,
Hun le ni, sum le paai, siitlo Zomi ading maa pangkhawm ciat ni…,

Tangkhua hongkhal semsem, lenmui hong kaai semsem taleh,
Mimbang pianpih it teng, ngaih teng laizom teng aw,

Khangthak Zomi aw, maa pangkhawm ni!

Tg. Michael Hau Thang.
Tedim.

ZOGAM LAPI

Zogam phualva mual hong kaita
Zo tunnu'n lam bang napak ni,
Gia bang zuun ni, khang tawntungin

Miphunglun leh ngalliam (kamkei) bualna
Sansi tawh an bang ih kheksa gamlei
A tawi siallum tualkhia ngeilo,

Hei, Zomi meidawi in taingei ngeilo
Zomi lau-in liing ngeilo, nuaisia zolo
Zomi duailo lungkia ngeilo

Khangsawn ten gia bang a zuun ding,
Ih Zogamnuam Maimit suan ni hai bang ngakni
Vanglian Topan lim hong sung hen, Zonunpaal muallo ding in.

Pr Thang Siangh

ITNA

ITNA…, ITNA…, ITNA…,
Lei khempeuhin a pulak pen.… tua ki- itna
Lungtangin zong a lunggulh pen… tua ki-itna
Mi khempeuhin a hanciam pen….. tua ki-itna
Ithuailo te’n a kisap pen ….. tua ki-itna


ITNA…, ITNA…, ITNA…,
Leiba lakpan a neihhuai pen ……….. tua ki- itna
Neihtheih lakpan a deihhuai pen ... tua ki-itna
Ki it kei leh na a sa pen … tua ki-itna
Zatkhialh khak ding a lauhuai pen… tua ki-itna


ITNA…, ITNA…, ITNA…,
Lungtang lim tawh a ki tehngat……….. tua ki-itna
Pasian hihna ih muh theihna …… tua ki-itna
Mawhna khialhna a maisak zo … tua ki-itna
Ngaihsuttheihna’n a kham zawhloh… tua ki-itna


ITNA…, ITNA…, ITNA…,
A hang omlo a hong piangtawm … tua ki- itna
Leiba lakpan loh leng a khang … tua ki-itna
Kilawh baih pen gawmkhop baih pen… tua ki-itna
A neilo te’n nei a kisak … tua ki-itna

JK Kam

SIAMSIN HOIH KHAT KA HIHI

Sang lai haksa ci kei ning
Nu tha, Pa tha khek ding nang hi.

Mandalay ni sa, ka khua nuam zaw ci kei ning
Gual tung tuang nang mun a hi.

Zomi Nam Ni cim huai ci kei ning
Pai tei tei ning Zomi ka hi!

Ngeina lam sin lawp lel ning
Theih huai mahmah lel a hi.

Sum dong mai mial ci kei ning
Minam ading mah a hi.

Siamsin te en neu kei ning
I gam a zun ding te hi.

Biakinn ah zong ki hel ning
Paian ta te kikholhna a hi.

Ni sim LST sim ning
Kha an lim pen a hi.

Ka sin pilna minam ading zang kik ning
I gam i tui it ding hi.

Ni sim tha thak la den ning
Siamsin hoih khat ka hi hi.

By, Zolianu

TUUNNU' ZOGAM DAM DING GEL AW

Mim bang pianna tunnu Zogam
Singdang ta in mel in ma zong
Zo vontawi ten, bang ai tuak in
Mel in ma ding i hiam?

Singdang vontawi mi zatam ten
Tunnu leitang an bang it e
Pham dong lung sitlo
Gam le nam ci’n diang uh e
Zo vontawi ten pupa gamlei
Pian in dangsak ding i hiam........

Singdang lai ah zezum tuak ding
Tun i deih hiam, zua deih hiam
Tang le Lia te lung in tuak leng
Kua ta’n ei gam, singta’n ei lei
Sut ding lungin gel ding hiam

Zovon ten lah tuipi lui gal
Mual za hal na heisan ta a
Vonte’n nuihciam na lelna pan
Tunnu Zogam lobang tul
Nau bang kap ding
Lai lungin na gel ngei maw.


By Munei Thangdal

ZOMI PHARAOH

Hih leitungah ka nuntak sung...
Vangsiatna(Kamsiatna)in tuihual bang hong khangin...
Huihpi, guahpi bang hong nawk zong...
Gentheihna, liangvaihna in hong tuam hen!
Phamawh kei.

Lau huaina meivompi hong kai lailai sin!
Tua tham lo-in,
Haksatna, gentheihnate' hangin,
Ka lutang sisan tawh kidim mah leh...
Cikmah ciang ka khakum(lungkia)peumah kei ding...

A kap ding hong sa nai vua,-
Kap dek kei ning ei!
Kah nading thu om mah ta vecin,

A'i zong,
Zomi Pharaoh lungtang hong en dih vou!
Ka kah ma-in ka lungtang kitam zan zihziah phot ve!
Zomi Pharaoh ka lungtang hih dan ai veh!
Thei ou leitung.

C Tuangpee (Mauvom)

KHAWLMUNNUAM PAN MINTHANG US

Khanglai momno lia le taang te’n
Hanlungciam in minthang Malay
Khawlmunnuam ci’n zuan mang ta ee…

Vei tak thei lo, tuai nau boih te’n
Pi le pu tawh Zogam lei ah
Zingvai hawm ding geel ngam lang ee…

Lungngai dih ve, lia le taang aw,
Zomi Zota bang ding’n bang ding’n
Singta lai ah sawl bang va hei…

Lunglau lo aw, Zogam lei aw,
Ciimnuai tate’ nunnuam ngah nang
Sianmang lung awi zingvai hi’n cia…

Tuun sung khat piang Ciimnuai tate
Khawlmun nuam pan minthang US
Sian aw lam bang na pi ve aw…

By: tpthawnpu