ZO LIANU SIANG HONG LEL ING EE

Solkha tang le, lengtong hoih bang

Ngaihno lakmai, et ka cim lo;

Unok pak le, len nupa bang

Etlawm duang pal, ngaihno hi cia.

Hem sinthu le, pal zatamte'n

Khen nang sinthu, Tong lel lo aw;

Sun sawt zankhua, sial cim theih loh

Lungsung phuh suang, ngaihno hi cia.

Tang sanggah pian, tual ka niam zong

Ka tong nau bang, hong sang aw ngaih;

Tak sinthu tawh, hong lel ingh e,

Sim leitungah, Nang tawh lo-in.

Khat tang lungzuan, zatam sial ingh

Tehpih omlo, vang kong ngaihna;

Luankhi zailan, hong awi ingh e

Koi kuam sawl bang, hei na hiam aw.

Sim leitungah, phualva tong ciam

Tullo itna, pak bang tawi ding;

Zatam lai-ah, Zota lungdeih

Zolianu siang, hong lel ingh e.

Tg Go Lam Khup, Geol Final

HONG SAM DEN

Taihinn mawtaw nei liapluapin,

Vang nei kisa sum lomtang tawh

Lian lua hau lua i omzen ha'ng,

Tawmvei sung bek Pasian' hong piak

Ha... kiphasak ke'n.....

Ahau azawng kuamah khenlo,

Atawntung mah i mai khutvan

Sihna hankhuk hong sam den......

Pu Zam Khan Thang, DipTh

SAIHKAA HAWLPA

Zan khua hong mial,
Khuapi kattaya lampi nawl munkhat,
Mercury meikhuam nuai-ah,
Saihkaa khat tawh ahawlpa.

Thum lo-in ngak veh.

Mawtawte'n paisan,
Cyclete'n paisan,
Mite'n paisan,
Ahun in paisan.

Kuama'n thudon kei veh.
Sum in zong thudon kei.

Inn aa naungek gilkial in kap veh.

Nau-an lei nang ... sum...
Gilkial thuak in ngak veh.
Paulo phunlo in ngak veh.
Ata thumanna tawh gil avah nang,
Zan thapai in ngak ee.. sum...
Saihkaa hawlpa khat.

Tg Vaphual